ཇིང་གར་རྒྱལ་པོའི་སྙིང་སྟོབས།

 ཇིང་གར་རྒྱལ་པོའི་སྙིང་སྟོབས།
——-སོག་པོའི་ཆབ་སྲིད་བཙོན་མ་ཧཱ་དྷ་ལགས་གློད་འགྲོལ།
4015d5ea-4ab9-4636-8ea5-32028f67d9d9རྒྱ་ནག་གི་བཙོན་ཐག་རིང་ཤོས་ཀྱི་ཆབ་སྲིད་བཙོན་མ། རྒྱ་ནག་དེང་གཞུང་དང་ལྟ་སྤྱོད་མི་མཐུན་མཁན་སྐུ་ཞབས་ཧཱ་དྷ་ལགས་ཕྱི་ཟླ ༡༢ ཚེས ༩འི་ཉིན་གྲོལ་འགྲོལ་ཐོབ་ཡོད་པ་རེད།
སྐུ་ཞབས་ཧཱ་དྷ་ནི་ལྷོ་སོག་གམ་ནང་སོག་མི་དམངས ༦༠༠༠༠༠༠ གི་ཆེས་སྐད་གྲགས་ཅན་གྱི་རྒྱ་ནག་དེང་གཞུང་དང་ལྟ་སྤྱོད་ཐ་དད་ཅན་དང་། མཚན་ཉིད་རིག་པ་དང་ཆབ་སྲིད་རིག་པའི་ཆེད་མཁས་པ་ཡིན།  དེ་སྔ་ཁོང་གིས༼ལྷོ་སོག་དམངས་གཙོ་མནའ་མཐུན༽ཞེས་པའི་སྒྲིག་འཛུགས་ཤིག་བཙུགས་ནས་རྒྱ་ནག་དམངས་གཙོ་ཅན་དུ་བསྒྱུར་རྒྱུར་སྐུལ་འདེད་དང་། ལྷོ་སོག་ལ་མིང་དོན་མཚུངས་པའི་རང་སྐྱོང་ཞིག་མངོན་པར་གྱུར་རྒྱུའི་དགོས་འདུན་བཏོན་ནས་ཞི་བའི་ལས་འགུལ་སྤེལ་ནས་འབད་བརྩོན་གནང་ཞིང་། ཕྱི་ལོ ༡༩༩༥ལོར། ཁོང་ལ“རྒྱལ་ཁབ་ཁ་བྲལ”དང“གསང་མྱུལ་བ”སོགས་མ་ཉེས་ཁག་གཡོགས་གིས་ལོ ༡༥འི་བཙོན་འཇུག་ཁྲིམས་ཐག་བཅད་པ་དང་། ཕྱི་ལོ ༢༠༡༠ ལོར་བཙོན་ཐག་ལོང་ནས་གྲོད་འགྲོལ་བཏང་ནའང་། ཡང་བསྐྱར་ཆབ་སྲིད་ཀྱི་ཐོབ་ཐང་ལོ ༤ ལ་འཕྲོགས་པ་རེད། ཁྲིམས་འགལ་གྱི་ལོ་བཞི་བོ་དེ་ནང་སོག་གི་ཁྲིམས་འགལ་གྱི་“བཙོན་ཁང་ནག་པོ”ཞིག་ཏུ་བཀག་འཇུག་བྱས།
སྐུ་ཞབས་ཧཱ་དྷ་ལགས་གློད་འགྲོལ་ཐོབ་རྗེས་ཁོང་གི་བུ་བེ་ལར་སི་བརྒྱུད་ནས་ཕྱི་ཕྱོགས་སུ་བརྙན་འཕྲིན་སྐར་མ་གཉིས་ཅན་ཞིག་བཏོན་ནས་གསལ་བསྒྲགས་ཤིག་སྤེལ་ཡོད་པ་དང་། བརྙན་པར་དེའི་ནང་ཁོང་གིས།  རང་ཉིད་མིང་གིས་གློད་འགྲོལ་ཐོབ་ཡང་དོན་གྱིས་ད་དུང་རང་དབང་མེད་པ་དང་། ཁོང་གིས་མུ་མཐུན་ནས་རང་ཉིད་ཀྱི་ཁྲིམས་མཐུན་ཁེ་ཕན་རྩོད་ལེན་བྱེད་རྒྱུ་ཡིན། ཞེས་བརྗོད་འདུག
སོག་པོ་མི་དམངས་ཀྱི་དཔའ་བོ་རུ་འབོད་པའི་ཆེད་མཁས་པ་ཧཱ་དྷ་ལགས་ཀྱིས་དཀར་པོ་ནག་པོའི་བརྙན་པར་ནང་ཡིག་འབྲི་གཅིག་གཅིག་བྱས་ཏེ་དལ་ཞིང་ལྷོད་པའི་ངང་བརྗོད་རྒྱུར། མི་ལོ ༡༩འི་རིང་གི་མ་ཉེས་ཁག་གཡོགས་ཀྱི་གྱོད་གཞིའི་བཙོན་འཇུག་ཁྲོད་བསམ་ཡུལ་ལ་ཤོང་དཀའ་བའི་སྡུག་གྱོང་མནར་གཅོད་མྱངས་པ་མ་ཟད། བཟའ་ཟླ་དང་བུ་གཉིས་ལའང་ནག་ཉེས་ཕོག་པ་དང་། རང་ཉིད་ད་ལྟ་དབང་པོ་སྐྱོན་ཅན་དུ་གྱུར་ཡོད། ཅེས་དང་། ཡང་ཁོང་གིས་བརྙན་པར་ནང་རྒྱ་ནག་དེང་གཞུང་གིས་ཁོང་གིས་ཕྱི་ཕྱོགས་ཀྱི་གསར་འགྱུར་སྨན་བྱད་ཀྱི་བཅར་འདྲི་དང་ལེན་བྱེད་རྒྱུར་བཀག་འགོག་ཅི་ཐུབ་བྱས་པ་མ་ཟད། ནང་མི་མ་གཏོགས་ཕྱིའི་མི་སུ་གཅིག་ལའང་ཐུག་གི་བཅུག་མེད་། རང་ཉིད་ད་ལྟ་ཡིན་ཡང་བཙོན་མ་ནང་བཞིན་ལྟ་སྐུལ་འོག་ཡོད་པ་དང་། བསམ་བློ་དང་བྱ་སྤྱོད་དུས་བཅད་ལྟར་སྙན་ཞུ་ཕུལ་དགོས་ཟེར་མོད།  འོན་ཀྱང་། ལུགས་མིན་དགོས་འདུན་དེ་དག་ངས་ངོས་ལེན་བྱེད་ག་ལ་སྲིད། ཅེས་དང་། དེ་མིན་བརྙན་པར་གྱི་མཇུག་ཏུ་ཁོང་གིས། བདག་གིས་མུ་མཐུད་ནས་མི་རིགས་གཉའ་གནོན་ལ་ངོ་རྒོལ་དང་། གསལ་བཤད་ཞུ་གཏུག་བྱེད་རྒྱུ་ཡིན། ཞེས་གསལ་བསྒྲགས་གནང་འདུག
སྐུ་ཞབས་ཧཱ་དྷ་ཡི་བུ་བེ་ལར་སིས་གསར་འགྱུར་སྨྱན་བྱད་ཀྱི་བཅར་འདྲི་སྐབས། རྒྱ་ནག་དེང་གཞུང་གིས་ཧོ་ཧཱ་ཐི་གྲོང་ཁྱེར་གྱི་བྱང་མཐའ་རུ་ཁོང་གི་ཨ་ཕ་ཧཱ་དྷ་ལ་ཁང་པ་ཞིག་བཀོད་སྒྲིག་བྱས་པ་དང་། ད་དུང་ཡིན་ཡང་རྒྱལ་ཁབ་བདེ་འཇགས་སྲུང་སྐྱོབ་མི་སྣས་ལྟ་སྐུལ་འོག་ཡོད་ཅིང་། མ་འདྲ་ས་ནི་གཞུང་གི་ལྟ་སྐུལ་མི་སྣ་དེ་ཚོ་ཁང་པའི་ནང་ནས་ཕྱིའི་ར་སྐོར་ནང་སྤོར་བ་ཙམ་རེད། ཡ་མཚར་བ་ཞིག་ལ་ཐོག་བརྩེགས་གཞན་དག་ལ་ཁ་པར་གྱི་བརྡ་རྟགས་ཡོད་ན་ཡང་ཧཱ་དྷ་ལ་བཀོད་སྒྲིག་བྱས་པའི་ཁང་པ་དེར་ཁ་པར་བརྡ་རྟགས་མེད་པས། དེ་ལས་ནང་སོག་གཞུང་གིས་ཧཱ་དྷ་ལ་ལྟ་རྟོགས་ནན་མོ་བྱེད་ཀྱིན་པ་མཚོན་ཡོད། ཅེས་དང་། ཡང་ཁོང་གིས། རྒྱ་ནག་དེང་གཞུང་གིས་ཞེ་ངན་ཁོག་བཅངས་ཀྱིས་ཁོང་གི་ཨ་ཕ་ལགས་མི་གསོད་ལག་དམར་དང་། སྐུ་འཕྲོག་ཇག་པ། བཙན་གཡེམ་ཉེས་ཅན་སོགས་དྲག་པོའི་ཉེས་ཅན་པ་རྣམས་དང་མཉམ་དུ་དུས་ཡུན་རིང་པོར་བཙོན་འཇུག་བྱས་པ་མ་ཟད། ད་དུང་དྲག་པོའི་ཉེས་ཅན་པ་དེ་དག་བསྐུལ་ནས་འཇིགས་སྐུལ་བྱེད་དུ་བཅུགས་ཡོད་པ་དང་། བཙོན་འཇུག་སྐབས་ཐེངས་གཉིས་ལ་ཁྱོན་བསྡོམས་པའི་ཉི་མ ༩༩འི་རིང་བཀག་བསྐྱལ་བྱས་ཡོད་པས། བསམ་བློར་རྡུང་རྡེག་ཚད་མེད་ཐེབས་འདུག ཅེས་བརྗོད་འདུག
དེ་བཞིན་དུ་སྐུ་ཞབས་ཧཱ་དྷའི་བཟའ་ཟླ་ཞིན་ནཱ་ཡིས་ཀྱང་བརྙན་པར་གསལ་བསྒྲགས་ཤིག་སྤེལ་ཡོད་པ་དང་། ཁོང་མོས་ཀྱང་གཅིག་མཚུངས་ཀྱི་དཀར་པོ་ནག་པོའི་བརྙན་པར་དེའི་ནང་། ང་ཚོས་ཧཱ་དྷ་ལ་ལོ ༡༥འི་བཙོན་འཇུག་གི་རྗེས་སུ་ལོ་བཞིའི་རིང་གི་ཁྲིམས་འགལ་ངང་བཀག་ཉར་ལ་ཞུ་གཏུང་མཐར་གཏུག་བྱ་རྒྱུ་དང་། ལོ་མང་རིང་ངའི་མ་བུ་གཉིས་ཀས་ཧཱ་དྷའི་ཉེས་མེད་ཉེས་འཛུགས་ཀྱི་གྱོད་དོན་དེ་གཏུག་སྦྱོར་རིམ་པ་བྱས་རྐྱེན་རྒྱ་ནག་དེང་གཞུང་གིས་འཁོན་ལན་སློག་ནས་ང་ལ“ཁྲིམས་འགལ་ཚོང་གཉེར་བྱས་པའི”ཉེས་མིང་བཙུགས་ནས་ལོ་གསུམ་གྱི་ཁྲིམས་ཐག་བཅད་ནས་ཁྲིམས་ཆད་ཕྱིར་འགྱངས་ལོ་ལྔ་ལ་བྱས་པ་དང་། ངའི་བུ་བེ་ལར་སི་ལ“ཁྲིམས་འགལ་གྱིས་དུག་རྫས་ཉར་བར”ཁག་གཡོགས་ཡོད། ཅེས་དང་། དེ་མིན་ཡང་ཁོང་མོས། གལ་ཏེ་རྒྱ་ནག་གིས་མིང་དོན་མཚུངས་པར་ཁྲིམས་ལུགས་ལྟར་རྒྱལ་ཁབ་བསྐྱང་ཚེ། ངའི་ཁྱིམ་ཚང་གང་པོའི་ཉེས་མེད་ཉེས་འཛུགས་ཀྱི་གྱོད་དོན་དེ་ཡོ་བསྲང་བྱེད་ངེས་ཡིན། ངའི་ཁྱིམ་ཚང་གང་པོར་གནོན་འཚེ་གཏོང་མཁན་ཉེས་ཅན་ངོ་མ་དེ་ཁྲིམས་ལ་སྦྱོར་ངེས་ཡིན། མི་གཞན་པའི་མགོ་རུ་ངེད་ཚང་གི་སྡུལ་བསྔལ་འདི་འདྲ་མི་ཡོང་བའི་སྨོན་ལམ་འདེབས་ཞེས་བརྙན་པར་ནང་བརྗོད་འདུག
བོད་མི་མང་ཆེ་བས་ནང་སོག་ཏུའང་མི་རིགས་ཀྱི་གནད་དོན་ཡོད་མུས་སུ་ཡིན་པ་མི་ཤེས་ལ། སོག་པོ་མི་མང་གི་ཐོབ་ཐང་དང་རང་དབང་། ལ་རྒྱ་རྩོད་མཁན་ཡོད་པ་དེ་བས་ཀྱང་མི་ཤེས། མའོ་ཙེ་ཏུང་གིས་གང་ན་གཉའ་གནོན་ཡོད་ན་དེ་ན་ངོ་རྒོལ་ཡོད་ཅེས་པ་ནང་བཞིན། སོག་པོའི་རྩྭ་ཐང་ནའང་བོད་དང་གཅིག་མཚུངས་ཀྱི་གཉའ་གནོན་དང་། མཐོང་ཆུང་། མཚུངས་སྒྱུར། བཤུ་གཞོག་སོགས་མི་རིགས་རྩ་མེད་ཀྱི་སྲིད་ཇུས་སྤེལ་གྱིན་ཡོད་པས། བཙན་དབང་དེར་ངོ་རྒོལ་བྱེད་མཁན“སོག་པོའི་དཔའ་རྒོད”དང“སོག་པོའི་མན་དྷི་ལཱ”རུ་འབོད་པའི་ཧཱ་དྷ་ལྟ་བུའི་ཇིང་གར་རྒྱལ་པོའི་སྙིང་སྟོབས་འཛིན་མཁན་ཡང་ཡོད་བཞིན་པ་རེད།

Advertisements