པདྨ་ཚེ་བརྟན་དང ༠༠༡ །

མཆན:༡༽གཤམ་གྱི་གནས་ཚུལ་འདི་བཀག་ཉར་ཁང་དུ་པདྨ་ཚེ་བརྟན་ལ་བདེ་འདྲི་ཐུག་འཕྲད་ལ་འགྲོ་མཁན་བརྫུས་མིང་ལ་ཁཱི་ཁཱི་ཟེར་བས་རྒྱ་ནག༼ཞིན་ལང་རོལ་རྩེད༽ལ་འགྲེལ་བཤད་བྱས་པའི་སྐད་ཆ་དང་། གློག་བརྙན༼ཐར་ལོ ༽བཟོ་སྒྲིག་པ་བསོད་ནམས་རྒྱལ་གྱིས་པདྨ་ཚེ་བརྟན་དང་ཁོང་གི་ཕྱག་རོགས་ནས་གོ་ཐོས། དེ་མིན་སྤྱི་ཚོགས་འབྲེལ་འདྲིས་སྨྱན་བྱད་ཁག་བཅས་ནས་ཕྱོགས་བསྒྲགས་བྱས་པ་ཡིན།
༢༽༠༠༡ ནི་པདྨ་ཚེ་བརྟན་ཕེང་ཨན་ཁུལ་བཀག་ཉར་ཁང་དུ་བཅུགས་དུས་བཙོན་ལྭའི་སྟེང་གི་ཨང་གྲངས་རེད།

Screen Shot 2016-06-29 at 16.03.05.png
ཉེན་རྟོག་པས་བཟུང་བསྡད་ཡོད་པའི་རྒྱབ་ན་ཨང་གྲངས ༠༠༡ ཅན་དེ་པདྨ་ཚེ་བརྟན་རེད།

འཛིན་བཟུང་གི་བརྒྱུད་རིམ།

ཁཱི་ཁཱི:སྤྱི་ཟླ ༦ ཚེས ༢༥འི་ཉིན་གྱི་དགོང་མོའི་ཆུ་ཚོད ༨ དང་སྐར་མ ༡༥ ཡས་མས་སུ་པདྨ་ཚེ་བརྟན་ལགས་པེ་ཅིང་ནས་ཟི་ལིང་ལ་འཕུར་པའི CZ6269 གནམ་གྲུར་བསྡད་ནས་ཚོ་ཇཱ་པའོ་གནམ་ཐང་ལ་འབྱོར་ཞིང་། དུས་ཡུན་སྐར་མ ༡༥འི་རྗེས་སུ་གནམ་ཐང་གི་བཏང་འཛིན་ཁུལ་ནས་ཕྱིར་ཐོན་དུས། རྒྱབ་ཁུག་གནམ་ཐང་ནང་ལོགས་ཀྱི་རྡོག་ཁྲེས་ལེན་ས་ནས་བརྗེད་པ་གཞི་ནས་ཤེས། དེ་ནས་ལམ་སང་ཕྱིར་རྒྱབ་ཁུག་ལེན་ཆེད་སོང་། སྐབས་དེར་བཏང་འཛིན་ཁུལ་ན་ལྟ་སྲུང་བ་གཅིག་ཀྱང་མེད་སྟབས། པདྨ་ཚེ་བརྟན་ལགས་ཐད་ཀར་རྒྱབ་ཁུག་ལུས་སའི་རྡོག་ཁྲེས་ལེན་སར་སོང་། སྐབས་དེར་ལྟ་སྲུང་བ་ཞིག་གིས་མཐོང་ནས་ཁོང་གི་རྒྱབ་ནས་སྐད་མཐོན་པོས་སོང་མི་ཆོག་ལུགས་དང་ད་དུང་མྱུར་བ་མྱུར་དུ་བཏང་འཛིན་ཁུལ་ནས་ཕྱིར་ཐོན་དགོས་ལུགས་བཙན་བཀའ་བཏང་། དེ་ནས་པདྨ་ཚེ་བརྟན་ལགས་ཀྱིས་གནམ་གྲུའི་འཛིན་བྱང་ལྟ་སྲུང་བ་དེར་སྟོན་ཞོར་དུ་རང་ཉིད་ཀྱི་རྒྱབ་ཁུག་རྡོག་ཁྲེས་ལེན་སར་བརྗེད་པའི་རྒྱུ་མཚན་དང་དེ་ལེན་ཆེད་ཡོང་ཚུལ་གསལ་བཤད་བྱས། ལྟ་སྲུང་བ་དེའི་རྣམ་འགྱུར་དྲག་པོས“འཛིན་བྱང་ཡོད་ཀྱང་སོང་མི་ཆོག”ཅེས་སྐད་ལོག་བྱས་ཤིང་། པདྨ་ཚེ་བརྟན་གྱིས་གོམ་པ་འགའི་མཚམས་སུ་མིག་གིས་མཐོང་འདུག་པའི་རྒྱབ་ཁུག་དེ་བསྟན་ནས། “གན་ངའི་རྒྱབ་ཁུག་རེད། རྒྱབ་ཁུག་བླངས་རྗེས་ང་ལམ་སང་ཕྱིར་ཐོན་ངེས་ཡིན”ཞེས་ཡང་ཡང་བཤད་ཀྱང་ལྟ་སྲུང་བ་དེས་མི་ཉན་པ་མ་ཟད་གནམ་ཐང་ཉེན་རྟོག་པར་ཞུ་གཏུགས་བྱས། སྐབས་དེར་པདྨ་ཚེ་བརྟན་བསུ་ཆེད་ཡོང་མཁན་གཉིས་ཀྱིས་ཀྱང་གང་ལེགས་ཅི་བཟང་གིས་འགྲེལ་བཤད་བྱས་ཀྱང་མ་ཕན། སྐབས་དེར་ཞབས་ཞུ་བ་ཞིག་གིས་རྒྱབ་ཁུག་ཚུར་སྤྲད་པ་དང་། དེ་ནས་ཁོང་ཚོས་གནམ་ཐང་གི་ལྟ་སྲུང་བ་དང་། ཞབས་ཞུ་བ། ཉེན་རྟོག་པ་གསུམ་བཅས་ལ“ད་འགྲིག་སོང་། དོན་དག་གཞན་ཅི་ཡང་མེད། ང་ཚོ་འགྲོ་རྒྱུ་ཡིན”ཞེས་ཞུས་ནས་འགྲོ་གྲབས་བྱས་ཚེ། ཉེན་རྟོག་པས་བདེ་འཇགས་ཁྲིམས་སྲོལ་དང་འགལ་ཡོད་ལུགས་བཤད་ནས་ངེས་པར་དུ་པདྨ་ཚེ་བརྟན་འཛིན་བཟུང་བྱེད་དགོས་ལུགས་བཤད་པ་དང་། ཁོང་ཚོས་གང་ཐུབ་ཅི་ཐུབ་ཀྱིས་གནས་ལུགས་རྒྱུ་མཚན་བཤད་ཀྱང་ཉེན་རྟོག་པས་མི་ཉན་པར། པདྨ་ཚེ་བརྟན་ལ་ལག་ལྕགས་བརྒྱབས་ནས་བཙན་དབང་གིས་ཉེན་རྟོག་ལས་ཁང་དུ་འཁྲིད།  དེ་ནས་སང་ཉིན་ཞོགས་པའི་ཆུ་ཚོད་ལྔ་བའི་པར་འདྲི་གཅོད་བྱས་པ་དང་། ཉེན་རྟོག་པས་སྤྱི་བོའི་སྒྲིག་སྲོལ་དཀྲུག་པའི་ཉེས་མིང་བཀལ་ནས་འདྲི་གཅོད་བྱས་པ་དང་། གནས་ལུགས་དང་རྒྱུ་མཚན་བཤད་དུས་ཉེན་རྟོག་པས་པདྨ་ཚེ་བརྟན་གྱི་ཁ་ཤུགས་ལ་མི་འདང་པས། ཉེན་རྟོག་པ་ཚོ་ཐབས་ཟད་ནས‘ཁྱེད་ལྟ་བུའི་གནས་ལུགས་ཤེས་བཞིན་དུ་ཁར་མི་ཉན་མཁན་དག་ནི་ང་ཚོའི་དམིགས་འབེན་གཙོ་བོ་དེ་ཡིན’ཞེས་གནས་ལུགས་མེད་བཞིན་དུ་སྐུར་འདེབས་བྱས།

ཡང་ཁཱི་ཁཱི་ཡིས་ཁ་གསབ་ཀྱི་ཚུལ་དུ་བཤད་རྒྱུར།  པདྨ་ཚེ་བརྟན་དང་ཁོང་ཚོའི་བར་ལག་འཛིང་ཁ་འཛིང་རིགས་ཅི་ཡང་མ་བྱུང་བ་དང་། ཁོང་ལ་ལག་ལྕགས་རྒྱག་དུས་ཀྱང་ངོ་རྒོལ་བྱས་མ་སོང་། ཉེན་རྟོག་པ་དེ་ཚོ་ཡོང་ནས་དྲི་བ་སོགས་གཅིག་ཀྱང་མི་འདྲི་བ་མ་ཟད། མ་མཐའ་རྒྱུ་མཚན་ཞིག་ཀྱང་མི་བཤད་པར་ལག་ལྕག་བརྒྱབས་ནས་འཁྲིད་སོང་པ་དང་། པདྨ་ཚེ་བརྟན་གྱི་ནང་མིར་བརྡ་ལན་ཙམ་ཡང་མ་སྤྲད་པས། པདྨ་ཚེ་བརྟན་གྱི་ནང་མིས་ད་དུང་ཡང་གནས་ཚུལ་དེ་ཤེས་རྟོགས་བྱུང་མེད། ཟེར།

ཉིན་ལྔར་བཀག་ཉར།

ཉེན་རྟོག་པ:པདྨ་ཚེ་བརྟན་གྱིས་ཉེན་རྟོག་མི་སྣའི་བཀག་སྡོམ་བསླབ་བྱ་ལ་མི་ཉན་པ་མ་ཟད་བཏང་འཛིན་ཁུལ་ནས་ཕྱིར་ཡང་མི་འགྲོ་བར། མུ་མཐུད་ནས་བཏང་འཛིན་ཁུལ་དུ་ཁ་རྩོད་ཚིག་རྩོད་བྱས་ནས་བསྡད་སྟབས། ཉེན་རྟོག་པས་བཙན་ཤེད་གྱི་དོན་རྐྱེན་བྱུང་ས་ནས་ཕར་ཁྲིད་དེ་བརྟག་ཞིབ་བྱས་པ་དང་། བརྟག་ཞིབ་སྐབས་ལས་འགན་སྒྲུབ་མཁན་ཚོས་སུན་མེད་ངང་རིང་གིས་སློབ་གསོ་དང་སྲིད་ཇུས་ངོ་སྤྲོད་བྱས་ཀྱང་། པདྨ་ཚེ་བརྟན་གྱིས་བརྟག་ཞིབ་ལ་ངོས་ལེན་མི་བྱེད་པའི་མ་ཚད་ཉེན་རྟོག་པའི་དྲི་བར་ལན་ཡང་བཏབས་མེད།

ཉེན་རྟོག་ཕྱོགས་ཀྱིས་པདྨ་ཚེ་བརྟན་གྱི་བྱ་སྤྱོད་དེ་སྤྱི་བོའི་སྒྲིག་སྲོལ་དཀྲུག་པར་ངོས་འཛིན་གྱིས་ཁོང་ལ་ཉིན་ལྔར་བཀག་ཉར་བྱ་རྒྱུ་ཐག་གཅོད་བྱས་ཏེ། པདྨ་ཚེ་བརྟན་ཕེང་ཨན་ཁུལ་འཛིན་སྐྱོང་བཀག་ཉར་ཁང་ལ་བསྐྱལ་བ་ཡིན།
༼ ཡིན་ན་ཡང་། བཀག་ཉར་དཔང་ཡིག་ཡོད་མེད་ད་དུང་གསལ་ཆ་མེད།༽

བཀག་ཉར་ཁང་དུ་ཐུག་འཕྲད།

ཁཱི་ཁཱི:དོན་དག་བྱུང་བའི་མཚན་མོ་དེར། གནམ་ཐད་དུ་བསུ་ཆེད་སོང་བའི་མི་གཉིས་ཀྱི་ནང་གི་གཅིག་གིས་ང༼ ཁཱི་ཁཱི ༽ལ་ཁ་པར་བརྒྱབས་ནས་གནས་ཚུལ་གྱི་བྱུང་སྟངས་གསལ་བཤད་ཞུས་ཤིང་། ཚེས ༢༦ཉིན། ཁཱི་ཁཱི་ཡི་ཉལ་ཆས་སོགས་ཁྱེར་ནས་ཕེང་ཨན་ཁུལ་བཀག་ཉར་ཁང་ལ་བདེ་འདྲི་ཆེད་སོང་བ་དང་། བཀག་ཉར་ཁང་གི་ལས་རེས་ཁང་གི་སྒོ་ཁར་དུས་ཡུན་སྐར་མ་གཉིས་གསུམ་ཙམ་ཐུག་ཐུབ་བྱུང་ལ། སྐབས་དེར་པདྨ་ཚེ་བརྟན་ལ་ལག་ལྕག་བརྒྱབས་ཡོད་པ་དང་། ལག་པའི་སྟེང་རྨ་ཁ་མང་པོ་མཐོང་གི་འདུག

སྨན་ཁང་ལ་བསྐྱལ་བ།

ཁཱི་ཁཱི:བཀག་ཉར་ཁང་གི་མི་སྣ་ཞིག་གིས་ཁོང་ཚར་བཤད་རྒྱུར། “པདྨ་ཚེ་བརྟན་གྱི་བྲང་ཁར་ན་ཟུག་སྐྱེ་བ་དང་། མགོ་ན་བ་སོགས་ཀྱི་ནད་རྟགས་ཡོད་པས་སྨན་ཁང་ལ་སྟོན་དགོས”ཟེར། ད་དུང་བཀག་ཉར་ཁང་གི་མི་སྣ་དེས“ཁྱེད་རང་ཚོ་རང་གིས་སྟོན་དགོས། སྨན་རིན་ཡང་རང་ཉིད་ཀྱི་སྤྲོད་དགོས། སྨན་བཅོས་བྱས་ནས་དྲག་སྐྱེད་བྱུང་རྗེས། མི་མཐུད་ནས་བཀག་ཉར་བྱེད་དགོས”ཟེར།

པདྨ་ཚེ་བརྟན་གྱི་སྙིང་ཁམས་ཧ་ཅང་མི་བདེ་བ་དང་། བྲང་ཁར་ན་ཟུག་སྐྱེ་བ། གཟའ་མིག་དམར་གྱི་མཚན་མོར་ཁྲག་ཚད་ལ་བརྟག་སྐབས། མཐོ་ཤོས ༢༠༠། དམའ་ཤོས ༦༠ ཡིན་ཞིང་། ཁྲག་གི་མངར་ཆའང་ཇེ་མཐོར་ཕྱིན་ཡོད་པས། ལག་པ་གཉིས་སྦྲིད་ནས་ཚོར་བ་མེད་པར་གྱུར་འདུག དེ་མིན་སྨན་པས་བཤད་པ་ལྟར་ན། པདྨ་ཚེ་བརྟན་གྱི་རྒྱབ་དང་ཕྲག་མགོ་སོགས་སུ་རྨ་ཁ་ཡོད་པ་དང་། མཚན་མོར་ན་ཟུག་ལངས་ནས་གཉིད་ཀྱང་མི་ཁུག་པའི་གནས་སྟངས་ཡིན་པ་རེད།

“སྟག་ཁྲིར” བཀྱིགས་ནས་འདྲི་རྩད།

བསོད་ནམས་རྒྱལ:ལས་བྱེད་པས་འགྲེལ་བཤད་གསལ་བཤད་གཅིག་ལའང་མི་ཉན་པར་རྣམ་འགྱུར་དྲག་པོ་བསྟན་པ་དང་། པདྨ་ཚེ་བརྟན་གྱི་གནས་ལུགས་རྒྱུ་མཚན་བཤད་ཀྱང་མི་ཉན་པར། ལམ་སང་ཉེན་རྟོག་པར་གཏུག་པ་དང་། ཉེན་རྟོག་པ་ཡོང་མ་ཐག་གསལ་བཤད་ཙམ་ཡང་མེད་པར་བྱ་ངན་སྤྱོད་ངན་སྟོན་ཞོར་པདྨ་ཚེ་བརྟན་ལ་ལག་ལྕགས་བརྒྱབས་རྗེས། ཁོང་གི་ཕྱགས་རོགས་དང་། ཁ་ལོ་བ་བཅས་ཁོང་རྣམ་པ་གསུམ་གནམ་ཐང་གི་ཉེན་རྟོག་ལས་ཁང་དུ་འཁྲིད་པ་དང་། དེ་རྗེས་ཟི་ལིང་གནམ་ཐང་གི་ཟི་ལིང་ཡན་ལག་ཉེན་རྟོག་ལས་ཁང་ལ་རྩིས་སྤྲད་འདུག

པདྨ་ཚེ་བརྟན་རང་གིས་བཤད་པར་གཞིགས་ན། ཉེན་རྟོག་པས་བཙན་ཤེད་ཀྱིས་ཁོང་གི་ལག་པ་གཉིས་ལ་རྒྱབ་ཏུ་ལག་ལྕགས་བརྒྱབས་པའི་མ་ཚད། ཤུགས་ཆེན་པོས་ཡར་བཀྱགས་ནས་བཟོད་དཀའ་བའི་ན་ཟུག་སྐྱེ་རུ་བཅུག་པ་དང་། གནམ་ཐང་ཉེན་རྟོག་ལས་ཁང་དུ། པདྨ་ཚེ་བརྟན་ལགས་ལྕགས་གཟེབ་ནང་བཅུགས་པ། དེ་ནས་རྒྱའི་སྐད་དུ་ལོ་ཧོ་ཏེང་ཟེར་བའི་རྐུབ་སྟེགས་སྟེང་ཟྭ་བརྒྱབས་རྗེས་དུས་ཡུན་རིང་པོ་ཚ་འདྲི་བྱས་ཡོད་པ་རེད།

རྒྱ་ནག་གློག་བརྙན་འཁྲབ་ཁྲིད་པའི་མཐུན་ཚོགས་ཀྱི་གསལ་བསྒྲགས།

རྒྱ་ནག་གློག་བརྙན་འཁྲབ་ཁྲིད་པའི་མཐུན་ཚོགས་ཀྱི་གསལ་བསྒྲགས་སྤེལ་ནས། གསལ་བསྒྲགས་ནང་རྒྱ་ནག་གློག་བརྙན་འཁྲབ་ཁྲིད་ནི་ལས་རིགས་མཐུན་ཚོགས་ཤིག་ཡིན་པའི་ཆ་ནས། མཐུན་ཚོགས་ཀྱི་ཚོགས་མིའི་བབ་འོས་ཀྱི་ཁེ་དབང་སྲུབ་སྐྱོབ་བྱེད་རྒྱུ་ནི་གཞི་རྩའི་འོས་འགན་ཡིན། མཐུན་ཚོགས་ཀྱིས་དོན་རྐྱེན་དེའི་བྱུང་རྐྱེན་དང་འཕེལ་རིམ་ལ་དོ་སྣང་ཆེན་པོ་བྱས་དང་བྱེད་ཀྱིན་ཡོད། འབྲེལ་ཡོད་སྡེ་ཚན་གྱིས་སྤྱི་ཚོགས་ཀྱི་སེམས་འཚབ་ལ་ཡ་ལན་སྤྲོད་རྒྱུར་འབོད་སྐུལ་ཞུས་པ་ཡིན་ལ། དེའི་ནང་ཉེན་རྟོག་པས་དྲག་ཤེད་བཀོལ་དོན་གྱི་རྒྱུ་མཚན་དང་ཁྲིམས་ལུགས་ལག་བསྟར་སྐབས་ཉེན་རྟོག་པས་ཁྲིམས་སྲོལ་ལྟར་བྱས་ཡོད་མེད། དྲག་པོའི་ལམ་ཁྲིམས་ལག་བསྟར་དང་ཡང་ན་ཚད་ལས་བརྒལ་ནས་ཁྲིམས་ལག་བསྟར་བྱས་ཡོད་མེད་སོགས་ཀྱང་ཐེ་ཡོད་ཅེས་གསལ་བསྒྲགས་ནང་བཀོལ་འདུག

སྨྱན་བྱད་དང་། གནད་ཡོད་མི་སྣ་དང་སྤྱི་ཚོགས་ཀྱི་དོ་སྣང་།

གཟའ་ལྷག་པའི་ཉིན་ནས་བཟུང་། རྒྱ་ནག་ནང་རྒྱུགས་ཆེ་བའི་སྤྱི་ཚོགས་སྨྱན་བྱད་རིགས་ཝེ་པོ་དང་སྐད་འཕྲིན་སོགས་དང་། དེ་བཞིན་འཛམ་གླིང་ཡོངས་ན་རྒྱུགས་ཆེ་བའི་ངོ་དེབ་དང་ཊི་ཝེ་ཊིར་སོགས་སུ་བར་མེད་དུ་ཐོན་གྱིན་པའི་གནས་ཚུལ་ཞིག་ནི་བོད་རིགས་འཁྲབ་ཁྲིད་པ་གྲགས་ཅན་སྐུ་ཞབས་པདྨ་ཚེ་བརྟག་ལགས་ཟི་ལིང་གནམ་ཐང་ཉེན་རྟོག་པས་འཛིན་བཟུང་དང་བཀག་ཉར་བྱས་པའི་དོན་རྐྱེན་དེ་རེད། དེ་དང་མཉམ་དུ་མི་སྣ་གྲགས་ཅན་མི་ཉུང་ཞིག་གིས་ཀྱང་ཁོང་ཚོའི་སེམས་འཚབ་བཏོན་འདུག་ལ། དཔེར་ན་རྒན་འཇམ་དཔལ་རྒྱ་མཚོ་ལགས་ཀྱིས “ཉེན་རྟོག་མི་སྣས་ཁྲིམས་ལུགས་ལྟར་ཁྲིམས་སྐྱོང་དང་། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་སེར་གྱི་ཁྲིམས་མཐུན་ཐོབ་ཐང་དང་བདེ་འཇགས་ལ་སྲུང་སྐྱོབ་བྱེད་དགོས” ཞེས་འབོད་སྐུལ་དང་། གླུ་མ་གྲགས་ཧན་ཧོང་ལགས་ཀྱིས། “ངས་ལྟད་མོ་བལྟས་ནས་འདུག་མི་སྲིད” ཅེས་དང་། དེ་བཞིན་དུ་བོད་རིགས་གླུ་མ་གྲགས་ཅན་གཡང་ཕྱུག་འཚོས་གཙོས་པའི་རིག་རྩེད་ཀྱི་སྡེ། དེ་མ་ཡིན་པའི་གཞིས་བྱེས་བོད་རིགས་མི་དམངས་ཀྱིས་རྒྱབ་སྐྱོར་དང་ཐུགས་ཁུར་གནང་ཡོད་པ་དང་། དེ་མིན་རྒྱ་ནག་གི་དྲྭ་ཚིགས༼ཚེ་ཞིན་དྲྭ་ཚིགས༽དང་དབྱིན་ཇིའི༼བྷེ་བྷེ་སེ༽། ཨ་རིའི་ནིའུ་ཡོག་དུས་བབ། རོ་འེ་ཊིར་སོགས་སུ་གནས་ཚུལ་བཀོད་འདུག

གཞན་ཡང་། པདྨ་ཚེ་བརྟན་གྱི་དགེ་རྒན་པེ་ཅིང་གློག་བརྙན་སློབ་གླིང་གི་དགེ་རྒན་ཆེན་མོ་སྐུ་ཞབས་ཧིག་ཅན་ལགས་ཀྱིས་ཚེ་ཞིན་དྲྭ་བར “པདྨ་ནི་ཧ་ཅང་གི་མི་གཤིས་ཀ་འཇམ་པོ། གུས་བརྩི་ཅན། འགྲོ་འདུག་སྤྱོད་གསུམ་ལ་རང་ཚོད་རང་ཟིན་ཅན་ཞིག་ཡིན་ལ། ཁོང་གི་ངོ་ན་དུས་ནམ་ཡང་འཛུམ་མདངས་ཀྱིས་ཁེངས་ཡོད། སྐད་ཆ་བཤད་དུས་ཀྱང་སྐད་མཐོན་པོས་བཤད་མི་སྲིད། དེ་འདྲའི་མི་ཀུན་སྤྱོད་ཡག་པོ་ཅན་ཞིག་གིས་ཧོལ་རྒྱུག་བྱས་སོང་ཟེར་ན། ང་ལ་དེར་ཡིད་མེད”ཅེས་བཤད་འདུག

གནས་ཚུལ་ཡོང་ཁུངས་ལྟར་ན། པདྨ་ཚེ་བརྟན་ལགས་ད་དུང་སྨན་ཁང་ནང་སྨན་གསོ་བྱེད་མུས་སུ་ཡིན་པ་རེད།
ཉེན་རྟོག་ལས་ཁང་གི་བཤད་སྲོལ་ལ་གཞིགས་ན། སྨན་ནང་ལས་ཐོན་རྗེས་ཕྱིར་ཕེང་ཨན་ཁུལ་བཀག་ཉར་ཁང་ལ་ལོག་ནས་ཉིན་ལྔའི་བཀག་ཉར་གྱི་ཉེས་ཆད་དེ་འཁུར་དགོས་པ་རེད། ཡིན་ན་ཡང་། གནས་སྟངས་ལ་འགྱུར་བ་ཐེབས་ཡོད་ཀྱང་སྲིད་ལ། གནས་ཚུལ་ཡོང་ཁུངས་ཤིག་གིས་ཉིན་གསུམ་གྱི་བཀག་ཉར་ཉེས་ཆད་ཕྱིར་འཐེན་བྱས་ཡོད་པ་འདྲ།

Advertisements